مبارك يعنى الحكمه

والله هنتبهدل من بعده ومش هنلاقى زيوا تااااااااانى

بلاش شعارات يا منى
وخلينا واقعين هو سياسى كويس ماشى بس سياسى خارجى ولكن داخلى
كان سايبها لحبة حرمية واولهم ابنه الى مصطفى بكرى جاب بلاوى عليه
وهو اظن الى صدر الغاز لاسرائيل وعمل حاجات كتير بلاش نظهر تعاطفنا كتير
وبعدين مش هنلاقى ليه ما فى ف مصر ناس اشراف كتير امال لما يموت كنا هنعمل ايه يعنى
لو كنا ساكتين فعلشان استقرار البلد ولانه خلاص ماشى

طيب تقدر ترشحلى رئيس مكانه غير عمر سليمان
انته ذكرت لجمال عبد الناصر بس نسيت النكسه
وذكرت لسادات بس نسيت اللحوم الفاسده والأمراض الخطيره
ايلى لسه لحد دلوقتى الشعب مش قادر يتخلص منها
انا مش بدافع عن مبارك بس كلمه حق محدش حيجى بعده ويقدر على اعباء مصر
اسمى انا مش بقول شعارات انا اول واحده لوحسيت ان مستقبلى فى خطر هنا
والبلد حتمسكها الأخوان همشى ومش هقعد فيها
علشان كده زعلانه على مبارك

بصى يا منى انتى عارفه انى كنت من اكتر مؤيدين حسنى وكان نفسى ان جيمى طبعا يبقى رئيس من بعده
لانى كنت شايفه انه موفر لنا الامان.(اه بعد ربنا طبعا)ة
بس طبعا كان فيه شوية حاجات مش كويسه او الواحد مش كان حاسس بيها اوى لانه مش هو المسئول يعنى مش بنشترى الحاجات ونعرف ايه غلى وايه لأ
بس حاليا انا بقول هو يمشى مش هنمشى على رأيهم)هههههه
لان البلد خربت والامان اللى كان موفره خربه فى اسبوع
يعنى يمكن هنا فى الاقصر وقنا مافيش خراب او خوف اوى بس قرايبنا فى القاهره مش كانوا بيناموا من الرعب
من الآخر اللى يطلع بلطجيه من السجون على شعبه ويرعبهم ويعمل كل اللى احنا شوفناه ده.ما يستاهلش انه يحكمها دقيقه واحده بعد كده

مش فاهمينى انا مش جايه من اروبا انا عارفه كل المساوئ دى كلها وعارفه ياحوبه الرعب ايلى كانوا عايشين فى قاريبك لأن قاريبى كانوا كده وكانت الكهربه مقطوعه عليهم والبلطجيه تتجول فى الشوارع بالأسلحه لولا الشباب ايلى كانوا بيبقوا على كل برج وربنا سترها وحماهم
وانا مع استقاله مبارك واهوالراجل مش حيترشح تانى وابنه كمان واتذل بما فيه الكفايه كفايه الرعب ايلى هو عايش فيه
يبقى نسيبه يعيش بسلام ونختار حد مكانه
صحيح انا منكرش انا جمال عبد الناصر زعيم بجد بس ليه وجه مظلم يعنى سياسته الخارجيه كانت ممتازه لكن فى الداخل الدنيا كانت خراب
السادات كان متوازن فى الخراب والتنميه
بينما مبارك هو راجل كويس بس الحاشيه ايلى كانت حواليه كانت مضيعاه كان مغيب ميعرفش حاجه عن الشعب فلذلك وقع فى شر اعماله ربنا معاه


بس محدش رد عليا مين يبقى مكانه غير عمر سليمان

سورى يا منى ايه السلبية الى انتى بتتكلمى بيها دى هو يعنى اما الرئيس وابنه اما مفيش رؤساء كويسين
انتى بتقولى مين مكانه وهو كان كويس اوى يعنى ،الى حواليه هما السبب ماشى وهو كان صباعة فى بقه يعنى ولا ايه
دا اولهم ابنه يا حبيبتى وان شاء الله هجبلك ثروتهم قد ايه فى البنوك برة دا معاه تليارات فاهمة تليار ،وناس مش قادرة تجيب فول
مهو عبد الناصر كان رئيس خد ايه هو وعياله و قريبو
ثانيا جمال عبد الناصر وحب الناس ليه ولما مات كانو رافضين السادات ومكانوش فاكرين ان فى حد هيجى زيه
ومسك السادات الحكم وعمل حاجات كتير من بعده
انا فجاة اكتشفت اننا عايشين فى عصر راسمالى مش اشتراكى ،الوزير دا معاه كام مليار دولار ،وكلهم دخلوا الوزارة بكام وطلعوا بكام
وناس مش لاقيه تاكل انتى بتتكلمى ازاى ،انا مش ضدة ومن الاول مكنتش ضده بس ضد ابنه والتنازلات الى بيقدمها يا حلوة علشان متتفتحش عليه وعلى ابنه ،ابقى شوفى بكرى جاب كام قضية ضده جمال مبارك يعنى امال انتى فكرك ساكت ليه علشان ميتحاكمش زى غيره بس هيجى يوم عليه
طبعا انا مش بستنكر الى عملوا والله لا طبعا ومش بقول انه يمشى لا كفاية عليه ،ومش بقول انه يتنحى بالطريقة مهينه ليه لا طبعا
وبعدين رعب ايه الى هو فيه دا معاه حرس كتير اوى اما الرعب الى تسبب فيه لمصر كلها دا ايه والشباب الى اتقتل فى الثورة برصاص حى وليس مطاط كما يقولون دا ايه ،مش هو السبب دا حبيب العادلى ماشى مين بيراسه ،
مش مهم الى يجى بعده يبقى كويس ولا لا المهم نكون عملنا حاجة فى حياتنا وغيرنا ،وبعدين ابسط مثال لما بتشترى جيب عجباكى اوى وبعد ما تقصر او تضيق بتقولى ياترى هلاقى زيها ،بتعملى ايه بتنزلى تدورى وتشوفى كويس لحد ما بتلاقى
زى كدة هيكون هندور وكل رئيس مرشح يحط برنامجه واحنا الى نقرر مش مجلش الشعب الى كل اعضائه مزورين ما عادا 12 كرسى فيه بس ،مش لازم اقولك اسماء دلوقتى واظن واحنا فى الجامعة كنا بنسال نفس السؤال مين هيجى بعده ومكناش نعرف حاجة عن سليمان
وفجاة عرفناه وعرفنا ان فى واحد بمكانته وحنكته فى العمل السياسى شفيق ايضا رجل ممتاز جدا
ادى اتنين اهم ولسة فى ناس كتير محترمين ومنعرفش عنهم حاجة صح ولا انا غلطانه ،
وبعدين الى بيقول مكانش هينزل الحكم قبل كدة كداب وغلطان لانه اعلن قبل كدة انه هيترشح لفترة جديدة قبل احداث 25 يناير
وبعدين خلاص كل واحد عرف انه لو عمل اى حاجة مش هيفضل مكانه وكل واحد بقى ليه حد واحنا بقينا نتكلم ونقول راينا وبصراحة
يابنتى اقرى جرايد هاتى المصرى اليوم انهاردة وشوفى البلاغات المقدمة ضد الحكومة الى فاتت كلها دا حاميها حراميها بداية من نظيف اخر حاجة قريتها انهاردة انه هو وهانى هلال مخصصين 120 فدان لفتح جامعة خاصة ومدينها لجمعة اسمها نظيف
رشيد محمد رشيد وكل الوزرا ،يا شيخة دا كفاية ان الواحد كان بيتكسف يقول انه مصرى
دلوقتى شوفى كل العالم بيتكلم عننا ازاى والمصرين والى عملوا ،طبعا انا ضدهم فى التدخل فى شؤونا
وياريت مش نبص تحت رجلينا
وبعدين هتمشى تروحى فين يا منى "ف العشة يا منى "هتروحى الكويت ولا اليابان قولى علشان اوصلك بالطيارة الخاصة بتاعة جمال ولا علاء اصلهم خلاص هيرجعوهلنا اصل راحت عليهم والحق هيرجع لاصحابه
يابنوك سويسر ا عايزين فلوسنا

هههههههه براحه شويه
انا مش سلبيه كل واحد اخطأ فى حق مصر حيتعاقب
انا قبل الخطاب كنت بندد برحيله ومحاكمته دوليا لكن لما شوفتوا مذلول كده ومنكسر ياحرام صعب عليا
وصعبانه عليا بلدى ايلى حتخرب وحتستعمر
انتى سمعتى خطبه الحومينيى بتاع ايران قال ايه
ومخططات الموساد الأسرائيلى وقطر اللهى يولع فيها بجاز
اترعبت الناس كلها شايفين مصر جوهره سمينه وكل واحد عايز ياخد قطعه
اما مبارك واولاده بئى حسابهم عند ربنا هو الأعلم
ايوا صحيح الناس مكنتش عايزه السادات لكن دلوقتى شخصيته السياسيه بتدرس فى المدارس العسكريه فى امريكا وغيرها
موضوع انك كنتى مش بتقدرى تقولى جنسيتك ده صحيح المصريين كرامتهم كانت ضايعه فى الدول العربيه والأجنبيه إلا قله يعنى
ربنا معانا
(هسافر الصين ياسمسوم ليا جماعه قرايبى فى السفاره هناك)
ولا كويت ولا يابان ولا سعوديه ولا اى حاجه

ايوه يا سومه وبمناسبة الرصاص اللى متحرم دوليا ده وهو استخدمه ضد شعبه اللى صبر عليه 30 سنه
احنا قريبنا عينه اتصفت بسبب الرصاص ده وبردوا مش هيبطل لغاية ما يمشى
ما هو مش معقول بعد الارواح والاصابات دى كلها نستسلم تانى

طيب ياحوبه قومى بينا نمشى
ونروح نعتصم معاهم فى ميدان التحرير
وبعدين مافيش اغلى من الأبن الراجل عايز يسيب الحكم لأبنه علشان يصالح سوزى
اصلها زعلانه معاه من خمس سنين قالتلوا كفايه بقى يامبارك وسيبها لجيمى قالها مش دلوقتى
قامت مخصماه

ههههههههههههههههههههههههه
والله فايقة ورايقة يا منى ومكنتش اعرف يا صاحبى انك عندك قرايب فى الصين ها
وبعدين مش معنى كلامنا دا اننا موافقين على الى بيحصل فى ميدان التحرير
بصى الى بيحصل ناس طالعة تقول دول بيجبولهم كنتاكى وخمسين جنية
وشباب يقول لا والله احنا بناكل شيبسى ومولتو
وناس تقسم ان فى ناس قاعدة بالقوة ومش قادرة تطلع
بس اعتقد ان الامور هتصلح ان شاء الله
بس انا بنت خالتى قالتلى السرقة لسة شغاله والبلطجية مازالوا بيقتلوا ناس كتير
ولا هى ولا جوزها قادرين ينزلوا الشغل ولا تروح لمامتها حتى الى قريبة جدا عنها
يعنى التليفزيون المصرى جايب الحياة وردى اوى بصراحة والناس هناك مازالت خايفة

انا بصراحه معرفش ظروف القاهره ايه بس اسكندريه جماعتنا هناك
مازالوا حابسين نفسهم فى البيوت اولاد وبنات بس طبعا من الساعه6لساعه 7الصبح بينزلوا الشباب قدام
بيوتهم ومقولكيش مدى الرعب والزعر ايلى كانوا عايشين فيه وقطع الكهربا وبلاوى سوده كانت بتحصل


اه ليا ناس فى الصين والمانيا واطاليا لو تحبى تسيبى البلد وتمشي معايا

انا مسبش بلدى وامشى ابدا متقلقيش يا منى يا حبيبتى هقعد هنا ها
وعايزة اقولك على حاجة لو كان عبد الناصر سياسى خارجى بس
امال مين الى عمل الاصلاح الزراعى
مين الى قضى على الاقطاع ، مين عمل السد العالى ،مين الى كان بيدى الناس فدادين من الاراضى ببلاش
مين الى خطط للحرب وحدد كل حاجة ليها73 ، مين الى شارك فى حرب 48 خسرنا اة بس باسباب
كل دا وتقولى سياسى خارجى
انا عارفة انك بتحبى الحاجات العلمية بس اظن انك دراستى تاريخ هاتى كتاب 3 ثانوى وراجعيه والنبى

اجيبلك كتاب تاريخ منين دلوقتى استنى السنه ايلى جايه ان شاء الله

لا يا سومه عبد الناصر ده ما كنتش بحبه لأنه راجل بق
قعد يهدد ويتوعد لاسرائيل وقعد يقول اننا عندنا وهنعمل فيهم ونسوى واقنع الشعب كله بده.
لحد ماحصلت النكسه اللى صدمت البلد كلها بسبب انه عيشهم فى احلام حتى احنا وبنحارب كانوا بيقولو اخبار كاذبة عن الجيش مانتى اكيد حافظه ال تاريخ
يعنى من الاخر مش بحبه لكن السادات كان راجل ما فيش منه
وعلى فكره فى حد مره قاللى اللى يحب عبدالناصر مش ممكن هيحب السادات

وبالنسبه لاغنية مبارك يعنى الحكمه
المفروض تتغير وتبقى
مبارك يعنى الازمه ودمار وخراب وحروب تهد جبال
هههههههههههههههه

لالا جمال عبدالناصر كان اسد كلهم كانوا بيخافوا منه بس المعتقلات كانت مليانه بالناس الغلبانه
وكان يأخت سومه ياصحفيه يالى عارفه تاريخ كويس كان محتكر الصحافه وموقيد الصحافين

لا يا حوبة بق دى احنا عارفين انا وانتى مين الى بقوا كويس ههههههههههههه
بس ف النكسة مش احنا ولا عبد الناصر السبب يا حوبة
لو شوفتى راجل كدة مش فاكرة اسمه كان رئيس الوزراء ايام عبد الناصر بيقول على النكسة دى كانت مؤامرة من امريكا
وبعدين لو كان بق مكنش وضع استراتيجيات حرب اكتوبر كلها
وفعلا يا حوبة انا مش بفضل السادات ولكن مش بكره ، ،بس عجبتنى كلمة وجهها للعرب كان بيقول فيها
اسماعيل ابو العرب ،وام اسماعيل ستنا هاجر وهى مصرية
واقولها للذين يقولون ان مصر تتتنتسب للفراعنة لا بل هم من ينتسبون الينا ،واقولها للعرب جميعا نحن افضل من اى دولة عربية
انسة منى هعرفك البيئة الصحفية علشان تحطيها ف معلوماتك
قبل الثورة كانت الصحافة اكثر ادوات الاحزاب فاعلية فى التعبير عنها وشرح مبادئها
بعد ذلك اخذت شكل الصراع
مع قيام الثورة بدات الصحافة والسلطة تاخذ شكل التبعية من خلال الاجراءات الادارية ضد الصحفين والصحافة
فى عهد السادات اطيح بعدد كبير من الصحفين والمفكرين والعلاقة كانت غير متوازنة بين السلطة والصحافة وانعدام الحوار بين الطرفين
فى عهد مبارك خرج ناس كتير من الحبس والكلام الحلو الى كان عندنا فى الكتب ولكن ظلت الصحف القومية اداة لتبرير الحكم واعمال الحكومة فى وجهة نظرى ووجود قيود لعمل الصحافة والاعلام بصفة عامة
يعنى فى الى مرينا بيه والصحافة مقيدة ،والى بيقول رايه كان بيروح وررا الشمس ماعدا السنين الاخيرة دى طبعا
كان فى حرية مشروطة